dimanche 5 septembre 2010

عدنا و العود أحمد

بسم الله الرحمان الرحيم
قبل كل شي , نحب نعرف بروحي
آني لاني كاتب
و لاني شاعر
و لاني مدون 

و لاني حتا نعرف نكتب سطر من غير أغلاط 
آني واحد (وحدة)  من الوحيد الي يكتبو مرة كلما سنحت الفرصة
يعني مرة بعد قداش
نكتب مرة خاطرة
نعمل مرة copier/coller لمقال عجبني (بالطبيعةنحط ديما المصدر)
مرة نحط تصويرة
كل مرة كيفاش
الحمد لله عارف قدري مليح و نعرف كوني ما نرتقيش حتا باش نكون مدون
هل الحكاية هاذي عاملها باش نعبي وقت الفراغ متاعي
لكن 
اليوم اكتشفت انو كونو قدري عالي
و عالي برشا زادا
هية قمت الصباح و حليت الناتبوك متاعي
و طحت نعمل في دورة على المواقع المسكرة
youtube, dailymotion, 
المدونات متاع بعض المعارضين
بعض المواقع الدينية
و برشة أخرين

الحمد لله
مسكرين و مشمعين بالشمع الأحمر
يرحم والديه عمار خايف على تونس من الانحلال الأخلاقي الموجود في هاذي المواقع
آني نحييه و نرحم على والديه على روحو الوطنية و كفاحو ضد الامبرايلية و ضد القوى الاستعمارية و الغزو الثقافي و الفايسبوكي
برجولية ياسر يخدم على روحو عمار
هيا كيف لقيت عمار يخدم على روحو و يحمي في الحمى و الدين قلت خليني نعمل طلة على المواقع المصادق علاها و المرضي عنها
الحمد لله الدنيا ميزالت بخير و تونس ميزالت قاعدة تتقدم و الكل قاعد يناشد
هيا قلت خليني ندخل للمدونة متاعي خليني نكتب حويجة 
http://tounsi-mzamar.blogspot.com/ 
و ما راعني غير عمار يضربني بالـــ404 متاعو و يهزني 
تفجعت و خفت
قلت ياخي آش نية الحكاية , بالكش كتبت الأندريسا بالغالط
عاودت كتبت 
و مرة أخرى يسكني عمك عمار و يقلي دوييو يا حسرة كيف كنت مواطن صالح, انتي وليت من المغضوب عليهم
يا جماعة اكتشفت كوني خرجت من جنة عمار
و كوني وليت شيطان من شواطن الــمعارضين و المواقع الدينية و 
daylimotion و youtube
اي نعم 
آنا شيطان
الحمد لله 
عمار غزرلي و علقلي وسام شيطنة
كيفي كيما 
youtube  و dailymotion
عرفتو علاش قدري عالي؟

Aucun commentaire:

Enregistrer un commentaire