جودة الحياة

بالله ما فهمتش آني آش معناها جودة الحياة

و علاش وين اقولو جودة حياة يربطوها بالمناطق الخضراء؟

ياخي أحنا في العراق و إلا أفغانستان؟

و إلا يمشيشي في بالهم كونا رسلة غنم؟

و الله موش لوكان نقصو شوية في أسوام المواد الأساسية, و عطاو للموظف حقو الي هو يمثل الطبقة المتوسطة و عماد المجتمع, موش خير

علاش ما يعطيوش الحق لكل تونسي كيلو لحم في الشهر بلاش؟

و إلا نص خبزة في النهار بلاش

و الا حتا حارة عظم في الجمعة بلاش

علاش ما نستغلوش الاراضي القاحلة و نزرعوها حتا بالبصل

علاش ما نعملوش الإكتفاء الذاتي متاعنا في الحمص و الفول على القليلة النفخان يتم بهواء محلي الصنع

علاش ما يعطيوش منحة للشباب الي احب يعرس

علاش ما يبنيوش عمارات ليلهم و يكريولهم بأسوام رمزية؟

علاش

علاش ما انحيوش الكتافات و يولي المؤهل العلمي و الكفاءة المهنية هو المقياس في التشغيل؟

علاش ما يقوموش بمقاضاة عمار 404 بتهمة انتحال شخصية الغير لأنو في الحقيقة هو عمار 403 متخفي في 404

علاش ما يقوموش بإعدام عمار 404 بتهمة قصان الألسنة و التسبب في إعاقات مستديمة للشعب التونسي.

علاش ما يحرقوشي و يسودولو وجهو كيما سود وجه تونس على الخريطة الانترنتية

وين الحرية

وين المساواة

وين الحق في العمل

وين الحق في الأجر المناسب؟

وين الحق في ممارسة حياة جنسية طبيعية

هاذي هي جودة الحياة موش حزمة سلق و ربطة معدنوس