جودة الحياة 2 : اللهجة التونسية

بسم الله الرحمان الرحيم
هاذي مقالة كتبتها عندي برشة (وقتلي كنت نافحة) في إطار الحملة متاع المطالبة بتخفيض الأسعار متاع المكالمات الهاتفية
نحب نعاود ننشرها في إطار جديد : جودة الحياة, و ذلك بمناسبة دخول البرتقاليين لبلادنا العزيزة تونس
------------------------

علاش اللهجة التونسية موش مفهومة؟؟
و علاش مسلسلاتنا ماهيش منتشرة كيما المسلسلات المصرية و إلا السورية؟
و علاش العلاقات متاعنا فاها برشة فتور و صحة رقعة ؟؟
علاش التونسي تحسو افبري كيما الــ3310 كيف يتكلم , اتقولش عليه ثمة آشكون في جرتو
آش كون المسؤول على هل الشي هاذا؟
بالله خلييونا نجربو حاجة
مثلا واحد ماهوش تونسي باش يطلب واحد صاحبو ماهوش تونسي زادا, كيفاش باش يتكلمو؟
موش تونسي 1: السلام عليكم
موش تونسي 2: و عليكم السلام و رحمة الله و بركاته
موش تونسي 1: شو حالك يا أخ العرب , هل أنت بخير؟
موش تونسي 2: الحمد لله على كل حال , أنا بخير
موش تونسي 1:شو حال خوك محمد هل اشترى السيارة الجديدة؟
موش تونسي 2:الحمد لله لقد اشترى الهامر السوداء, كله من فضل ربي
موش تونسي 1:الفضل لله, و كيف حال صديقنا ثامر , لم أره منذ فترة طويلة
موش تونسي 2:ثامر يعمل في شركة البترول الآن و اشترى فيلا جديدة
موش تونسي 1:الحمد لله
موش تونسي 2:الحمد لله
موش تونسي 1:هل سمحت لي بلحظة , فهناك من يدق على الباب و سأفتح له , لا تعلق أرجوك
موش تونسي 2:حاضر خذ كامل وقتك
"صمت لدقيقتين و نصف"
موش تونسي 1:احرز من معي الآن؟
موش تونسي 2:من ؟؟
موش تونسي 1:لا , عليك أن تحاول
موش تونسي 2:مصطفى؟
موش تونسي 1:لا
موش تونسي 2:علي؟
موش تونسي 1:لا
موش تونسي 2:عمر؟
موش تونسي 1:لا
موش تونسي 2:فريد؟
موش تونسي 1:لا
موش تونسي 2:عطوان ؟
موش تونسي 1:لا
موش تونسي 2: سمير
موش تونسي 1:أحسنت لقد وصل للتو من رحلته الصيفية من باريس
موش تونسي 2: كيف حالو و كيف أخبارو؟ هاتو يا أخي هاتو
سمير ماهوش تونسي 1:أهلا كيف حالك
موش تونسي 2: الحمد لله , هيك ترحل من غير ما تخبرنا؟؟
سمير ما هوش تونسي : سامحني يا أخي لقد ...

قصت المكالمة على خاتر الشارج متاع برتابل موش تونسي 2 وفا , أما راهم كانو انجمو اكملو يحكييو للصباح و من غير لا يعملو option متاع التيلكوم و الا التونيزيانا
حسب رايكم قداش قعدو يتكلمو؟
ما تنساوش راهم ما هومش توانسة
نص دقيقة ؟؟
لا
دقيقة؟
زيد
زوز دقايق ؟
هكاكة محسوب (دقيقتين و نص بالضبط)
نزيدوهم دقيقتين و نص متاع الصمت
يطلعو 5 دقايق : درج و هوما يحكييو في 140 كلمة
قداش اخلص زعمة الموش تونسي 1 (هو الي طلب)
محسوب 225 مليم
درج كامل = 225 مليم ؟؟؟
اينعم ما هومش في تونس راهم
ما هوش موضوعنا هاذا
يلعن بوها الفلوس
خلينا نشوفو زوز صحاب توانسة كيفاش باش يحكييو:

التونسي 1 : بربي اطلبني تو تو

التونسي 1 علق(ما عندوش برشة من وسخ الدنيا)
المكالمة دامت أقل من ثانية
خلص علاها 55 مليم
أي نعم 55 مليم
إذا كانت الدقيقة = 220 مليم
و النبضة = 15 ثانية
يعني كيما تتكلم ثانية كيما تتكلم 15 ثانية تخلص كيف كيف
يلعن بوها الفلوس, ما هي إلا وسخ دار الدنيا
الفايدة في صحة اللبدان
الفلوس تجيبها الرجال
الفلوس تمشي و تجي .... إلخ إلخ
و زيد ماهوش موضوعنا هاذا
نرجعو للصحيح
بالله شوفو هاكل زوز متاع بكري: السلام عليكم
و اللوخر رد عليه و عليكم السلام و رحمة الله و بركاته
أنا يظهرلي 10 بالميا من التوانسة يبداو بالسلام (من غير عليكم)
و 1 مل ألف هاكاهو إردو السلام بالكامل( و عليكم السلام –من غير و رحمة الله و بركاته--)
إذا الكلام خذا زوز دقايق و نص من الوقت
يعني 150 ثانية
و تكلمو محسوب 140 كلمة
الكلمة موش تقعد محسوب ثانية؟
آش يعني ؟؟
يعني يتكلمو بأقل من راحتهم
عندهم الوقت الكامل باش اكونو متربين و باش يسألو على صحابهم و باش حتى يقعدو ساكتين إذا أيحبو
ما يدبر فيهم حد
و شوفو هاكل زوز توانسة , إلي ما حكا فيهم كان واحد برك و لتو يستنى في تلفون صاحبو( عريان مع عريان ما يتلاقاو كان في الحمام)
لا سلام و لا كلام
ما هيش قلة تربية هاذي؟
و حتى لوكان طول في الهدرة, راهو طلب منو قضية
4 كلمات = 1 ثانية
4 كلمات اخلص عليهم 55 مليم؟؟
يلعن بو وسخ دار الدنيا
عادي ياخي ؟؟
في ثانية نتكلمو 4 كلمات؟؟
آش كون من الشعوب و الأقوام الأخرى ملي تنطق كلمة كل ثانية باش يفهمنا ؟؟
تي ممكن طبلة وذانهم تتنقب إذا قعد يسمع فينا درج كامل
و بعد انقولو آش بي لهجتنا ما هيش مفهومة؟؟
بالطبيعة إذا أحنا ما ناش كيف ساير خلق ربي
و حسب رايكم آش كون المسؤول في تدهور و تزفيت و تقزيم اللهجة التونسية؟؟
آني مانيش باش نجاوب و المجراب تحكو مناكبو